Ауық-ауық қыжыл әдетте диетадағы қателіктермен, артық тамақтанумен және жүріс-тұрысы аз өмір салтымен байланысты. Бірақ жүкті әйелдерде ол басқа себептермен де түсіндіріледі^1,3:

• Жүктілік кезінде бөлінетін гормондар бұлшықеттерді, соның ішінде өңеш сфинктерін босаңсытады, сондықтан клапан асқазанның ішіндегісін кері жібере алады;
• Гормоналды өзгерістер асқазанның қозғалғыштығын (моторикасын) төмендетеді, сөйтіп ол тамақтан босау үшін ұзағырақ уақытты қажет етеді. Сондықтан тамақтанғаннан кейін өзімізді асқазанымыз лық толғандай сезінеміз.

1-ші немесе 2-ші үш айлықтағы ауық-ауық қыжыл жүкті әйелдің денсаулығына соншалықты әсер етпейді, бірақ бұрынғыдан да көп қыжылдатып, құстыруы мүмкін. Қалай болғанда да, бұл жағымсыз симптомдарды дәрігермен талқылау керек. Бұл олардың гастроэнтерологиялық аурумен байланысты емес екеніне сенімді болудың жалғыз жолы. Көбінесе қыжыл жүкті әйелдерде 3-ші үш айлықта пайда болады.

ҚЫЖЫЛДЫҢ АЛДЫН АЛУ

Қыжылдан құтылудың ең жақсы жолы – оның алдын алу. Ол үшін дәрігерлер әдеттер мен мәзірді қайта қарауды, қоздыру факторларын жоюды ұсынады. Сонымен қатар, бұл кеңестердің пайдасы тек жүктілік кезінде ғана емес. Төмендегілерді орындап көріңіз^1,3:

• Тұзды, ащы және майлы тағамдарды көп жемеңіз, қызанақ, пияз, цитрус жемістерін аз жеңіз;
• Кофеден, алкогольден, газдалған сусындардан бас тартыңыз – олардың барлығы қыжылды қоздыру қаупін арттырады;
• Кішкене порциялар, бірақ жиірек жеңіз, осылайша тамақ асқазанды толтырмайды;
• Тамақтанғаннан кейін ұйықтар алдында кем дегенде бір сағат күтіңіз;
• Қозғалыңыз, бірақ тым белсенді емес, бұл жағымсыз сезімдерді азайтуға көмектеседі.

Қыжылға қарсы белгілі халық емі – сүт – ішінара ғана көмектеседі. Иә, ол артық тұз қышқылын уақытша бейтараптандырады, бірақ сүттің құрамындағы май асқазан сөлінің өндірілуін ынталандырады, демек қайтадан қыжыл тудырады. Егер сіз қыжылға қарсы сүт ішсеңіз, майлылығы аз сүтті аз мөлшерде ішіңіз.

ЖҮКТІ ӘЙЕЛДЕРГЕ АРНАЛҒАН ҚЫЖЫЛҒА ҚАРСЫ ЗАТТАР

Егер өмір салтын өзгерту тамақтанғаннан кейін жағымсыз симптомдардан құтылуға көмектеспесе, дәрігерлер жағымсыз әсерлері неғұрлым азырақ болашақ аналарға арналған дәрі-дәрмектерді таңдайды. Көбінесе антацид препараттары тағайындалады^1,3.

Антацидтер – асқазан сөлінің бөлігі болып табылатын артық тұз қышқылын бейтараптандыратын заттар. Нәтижесінде асқазан сөлі өңешке түскеде шырышты тітіркендірмейді және қыжыл симптомдарын тудырмайды. Бұрын жақсы сұраныста болған ең қарапайым антацид – бұл натрий гидрокарбонаты немесе ас содасы. Қазіргі заманғы дәрі-дәрмектерден айырмашылығы, сода ұзақ уақыт әрекет етпейді: тұз қышқылымен реакцияда көмірқышқыл газы пайда болады, ол сөлдің бөлінуін ынталандырады, тиісінше қыжылдың жаңа ұстамасын тудырады. Бұл әдіс бойынша ұзақ уақыт «емделудің» қажеті жоқ: натрий сұйықтықты тіндерде сақтайды, ал жүкті әйелдер үшін ісіну қажет емес³.

Құрамында кальцийі мен магнийі, ағзаға арналған табиғи және кәдімгі элементтері бар антацидті препараттар қыжылмен күресуге көмектеседі. Кальций мен магний қосылыстары асқазандағы қышқылдықты төмендетеді және оның шырышты қабығын ағзаға зиян келтірмей қорғайды. Бұл элементтерді қамтитын препараттарды тіпті жүкті әйелдерге де қабылдауға болады³.

1. Juan C Vazquez. Heartburn in pregnancy//BMJ Clin Evid. 2015.

2. Heartburn// Mayo Clinic.

3. Елохина Т.Б., Тютюнник В.Л. Гастроэзофагеальная рефлюксная болезнь при беременности// РМЖ. Мать и дитя №19 от 28.08.2008 — стр. 1243.